سلى صيامك مع شمساوى

السلام عليكم ورحمة الله وبركاتة

كل سنة وانتم طيبين يا احلا شمساوية

انا عامل التوبيك دة عشان نتكلم عن الشهر الفضيل رمضان

عايزين ندخل نتكلم فى 3 نقط

1- اية العادات اللى مبتعجبكمش بتحصل فى رمضااااان

2- موقف ظريف حصلك فى رمضاااان متقدرش تنساة

3- بتعيش يومكم ازاى فى رمضاااااان

واى حد عايز يناقش نفطة معينة انا معاكم وهبدا فى البداية

الموقف الطريف اللى حصل فى رمضان ومقدرش ابدا انساةةةة

السنة اللى فاتت احمد عصام صحبى عزمنى انا واصحابنا على الفطار عندهم فى البيت
المهم روحنا البيت عندو وقعدنا نلعب فيفا والعاب على الكمبيوتر المهم طرب المدفع والاذان اذن قومنا نصلى ورجعنا عشان نفطر بدا بالبلح وشربنا كلنا وتمام وبعدين بدا يفرش الترابيزة بالاكل وكلنا قعدنا على السفرة
انا طبعا فى نوع اكل معين باكلة وفى انواع مش باكلها ومنها السمك بجميع انواعة وانواع من الطيور
وبدا يفرش السفرة وحط السلطات وبعدين الارز والاقى المعلم داخل بنفسة وماسك اطباق السمك
تخيلوا بقى الموقف وطبعا باقى اصحابنا ميتين من الضحك وانا وشى جايب الوان وبعدين والد احمد وولدتة دخلو عشان ياكلو معانا بقى الموقف اصعب واصحابى عمالين يضحكوا واحمد واهلو عمالين يقولو العيال دى هبلة ولا اية لقيت نفسى تلقائى بفتكر كركر وهوا بيقول انا جيت من سويسرااا و بقولهم انا لازم انزل حالا ورايا مشوار مهم طبعا مدخلتش عليهم بس كان لازم اخلع منهم باى طريقة لان السمك بالنسبالى انتحار ومن يومها قبل ما حد منهم بيعزمنى بيقولى الاكل اية لو يناسبنى بروح لو لا بيعمل الاكل اللى بحبة يارب يكون الموقف عجبكم

هههههههههههههههههههههههههههههههههههههه
انت بتفكرنى بواحد صحبى برضة كان عزمنى انا واصحابى على الفطار
بس المشكلة ان الاكل كلوا مكنش يتاكل متفهمش بقا جايبوا منين

عمرك شفت فى حياتك ارز بنفسجى
طيب ارز بمبى

اذا لا تعليق
كلنا طبعا قعدنا مستنين العشا تدن علشان كل واحد
يروح بيتة ويدور على حاجة يفطر بيها
بس احلى ما بيبقى فى العزمات انت واصحابك بقا وهزار ورخامة على بعض
وتسلم يا مانوو على الموضوع اللزيز دا
وارجو تقبل مرورى

نورت التوبيك يا معلم وفعلا مواقف مبتتنسيش

بجد هايلة اوى الفكرة يا مانو

وبشكرك على المجهود الرائع اللى انت بتقدمه باستمرار

احلى ايام رمضان لما كنت صغير

مش ممكن تتكرر تانى كنا يوم الوقفة نجيب عربية رمل ونفرش المنطقة بيها

ونروح نشترى الواح خشب فيلرى ونعمل بيها اجوان ونلعب كورة لحد الفجر

وكنا نروح ناكل كشرى عند محل المسلم

ونرجع نتدفا نجيب خشب مكسر ونحطه فى صفيحة ونولع نار

ونعمل شاى واحنا قاعدين فى الشارع احلى ايام عمرى

حلوه اوى فكرة التوبيك دى انا برضوا احلى ايام رمضان وانا صغيرة

قبل رمضان بااسبوع كنا انا اخواتى نعمل زينة ونزين البيت وبابا يجيب الفوانيس ونمل البيت

نور ونجيب دناميت بس دلوقتى بقى كل واحد كبر بس بردوا رمضان بيكون حلو فى العزومات

شكرا يا جماعة على المشاركات ولسة متنظر مشاركات تانية

موضع حلو اوى يا مانو بجد

انا بقى كنت زمان نعمل الزينة من الورق كنا بنجيب
الكساكيل بتعتنا ونقطعها ونجيب دقيق ونعملها هية واللمبت
وكنا بنعلقها وانا مش هنسى لما كنا بنجيب الرملة ونفرشها
وفى ست عندنا اسمها ام يحى كنا تقعد ترش مية علشان مش نلعب
كانت كل ما ترش مية نجيب رملة ونغطيها لحد ما هية زهقت وسبتنا
وكنا نجيب العرض زى ما انور ما قال ونلعب ونصبح اول يوم العيد نصلى
ونروح ناكل كشرى دة اساسى لازم بس كنا بناكل من مصر القديمة
من مرزوق ونرجع نلعب شوية كورة ونطلع ننام لحد بليل واول يوم مكناش بنخرج

يااااااااااة ايام كانت جميلة اوى

حابب اضيف ان احلى رمضان انا عيشته فى الغورية

الغورية والحسين وخان الخاليلى والمناطق الشعبية الجميلة اوى دى

وكمان بيبقه موجود سائحين

والمقاهى الىل بنقعد عليها انا واصحابى فى الفيشاوى

بجد احلى ايام هى ايام رمضان

رمضان كريم :#150

جميل يا جماعة ردودكم ومستنى باقى المواقف

اما انا بئا فكنت اهبل كنت بقول على الفوانيس الفنانيس و عليتنا ماسكهالى لحد دلوقتى و بيضحكو عليا بيها من 14 سنه لدلوقتى

و الموقف الجامد طحن بئا اول يوم سحور كنت مع صاحبى و عشر عمرى فى الشغل و رجعنا متاخر اوى على السحور
هو خد عربيتهم وصلنى لميدان الجيزه و روح و انا هركب من الموقف بتاع الجيزه و ركب و العربيه كملت اطلع يا اسطى
ادامه مكروباص راكن سادد المخرج تيت تيت جالو واحد من تحت الارض يقوله ي نهار ابوك اسوح
انته حملت عليا و انا ابلك فى الدور و جابه من قفاه و التانى راح نازله الساعه كاااااااااااااااام 3 باليل انا جاى ابلك بس انته الى كنت بتاكل
التانى يقله كنت بتسحر و الاول يقله اسائل سيد حلمبوحه هو يشهد انا جاى ابلك و لا بعدك
التانى يقله انا لما جيت مكنش حد ادامى نسال حلمبوحه ( الساعه 3.30 ) يا اسطى عايزين نتسحر عديه خلينا نروح ابداااااااااااااا
سال سيد حلمبوحه و لا معرفش ايده دا قاله لا هو جاى ابلك نزل الناس يا اسطى هو سمع كداو ساب الاول و مسك فى
صاحبنا ضرب و شتيمه و الناس تحوش دا فيلم هندى ادامى و مش عايز يخلص هوب الله اكبر الله اكبر الفجر ادن

الله يحرق السواق على المكروباصات على الدور الى واقفين فيه و مش عارفين مين ابل مين و فى الاخر الاتنين طلعو مع بعض مليانين
محدش ابل التانى و 14 واحد متسحروش بسبب ساعه و ربع خناق

( و دا الموقف الى حصلى و فى نفس الوقت الحاجه الى مش بحبها ف رمضان ان السواقين مش بيهمها سحور و لا فطار يقلك انا مالى )

ههههههههههههههههههههههههههه
يخربيت عقلك يارامى موقف تحفة بجد

اكيد لسة المواقف كتير يلا مستنى باقى المواقف بتاعتكم

عشان نتكلم على العادات بتاعتنا فى شهر رمضاااان

انا احلى العادات اللى بحبها هى السهر فى الشارع لحد الصبح وكلنا والجيران قاعدين مع بعض ونقضيها تريقه وضحك للصبح
اما العادات السيئة انك تشوف واحد فاطر وانت ميت من تعب الصيام

موضوع هايل يا مانو

شكرا يا حودة على ردروك الورعة وفعلا عادات تخنق

يا ويلكم يا ويلكم يا ميت نهار ويلكم يا شمساوية ونكمل

ومن العادات اللى بتضايقنى فى رمضان

انك تلاقى حد بيوهمك انة صايم يفضل يكلمك والسيجارة فى ايدة ويقولك انة مبتفطرش

ولا واحد يفضل يبص على كل بنت معدية ومن بعدها يقول اللهم انى صائم

ولا بنت تعمل نيوبوك عشان رمضان وتتحجب حجاب كدة وكدة وتشترى بنطلون جينس اقل مقاسين عشان لزوم النيو بوك وتمشى فى الشارع فى نهار رمضان

للحديث بقية

» كيف تجافظ على صيامك وانت على الانترنت
» فطارك مع شمساوى
» فوزاير شمساوى فى رمضان والجائزة كارت شحن
» فطارك مع شمساوى
» بقالة منتدى شمساوى